親愛的Facebook：
在下已入藉FB，大大話話都有10年。由當時2007年，叫大家由Xanga轉場去玩FB但俾人白眼嘅年代，去到今時今日，自己鬥咗個總算有人睇嘅FB Page出嚟。雖未至於專業級用家，但總算資深，不過呢十年，睇住你大，同時睇住你壞。
曾幾何時，FB仲係好Pure好True嘅年代，我去旅行時，Friend子喪畀Like；FB發現邊個拍拖邊個散咗，大家Offline八；你糾結緊Relationship status填Single定Complicated好時，有個舊朋友無啦啦Poke你唔知為咩，結果你哋又Friend返。啲人成日話：「網上世界令人關係疏離。」喺嗰個年代，我會反駁，「唔係囉，你識用Facebook可以令你更了解你嘅生活圈子。」
不過，回不去啦！依家個Facebook係癡線架！你一上FB，就係一堆又一堆重覆嘅片，一模一樣嘅內容。呢個Page出「陳奕迅英式口音超迷人」，另一個Page又出「陳奕迅講英文好好聽」，重點係咩？係佢哋全部都係偷片架！（當然如果大家加句「授權轉載」係大晒嘅，好似係）最煩膠係，你用正方度好似搶眼啲，我又用正方度，最近進化到長方度！大佬呀，我部機係16比9架！大家為咗喺FB生存，完全唔理user experience。
不停見到陳奕迅、陳法拉講英文都算，去到大事大非時，好神奇地，你只會見到同你意見相近嘅Post或者朋友Status；至於同你道不同嘅，Sorry，喺Newsfeed全部Out。
你Like咗蘋果日報、100毛Page咩，FB就Label你係黃絲，你唔好諗住Like埋相反政見嘅Page可以呃到佢，因為…你喺Fb上每一個Like，每一個View，喺咩網頁睇得最耐，每一個微細舉動，佢都幫你統計，順手做埋人口分類。
我明，你係想我哋睇到自己順眼嘅嘢，廢事見到大多唔岩心水嘅意見篤眼篤鼻，令我哋離你而去嘛。不過，結果係點，結果係每一個意見相近嘅人，喺FB圍爐取暖，但到現實世界，咪又係民建聯贏較多席；曾俊華咪又係落選；TVB咪又係咁多人睇。喺FB自我感覺良好，返現實就似去咗平衡宇宙，呢種打擊，真係唔係次次受得住。
朱克伯格成日話要Make a better world，但人人眼界片面，分析唔到全局，我睇唔到世界可以點進步。唯一見到進步嘅係，Facebook盤數越來越靚，搵錢招數越來越多。當日你靠一眾專頁嘅Content吸用戶，今日佢就嘗試用屎橋賺錢，唔畀錢嘅Page就俾人「發配邊疆」，要用戶去另一Newsfeed先睇到，咁叫咩，叫過橋抽板！
今時今日，好多人已當FB係新聞APP，想返去做返最原始嘅社交平台？回不去了（要睇私人嘢，請移玉步去IG，呀！咪又係FB旗下）。不過唔好忘記，FB係靠好嘅內容起家，但當FB變成一個只會推廣告嘅平台，我可以講，只會係死路一條，話說，邊有電視台開一個台淨係賣廣告？
by千頌C@堆填區
